प्रभावकारी रूपमा प्रार्थना कसरी गर्ने

प्रार्थना भनेको परमेश्वरसँग सम्बन्ध गाँस्नु हो — यो धर्म वा धार्मिक विधि हैन

प्रार्थना भनेको केवल शब्दहरू दोहोर्‍याउनु मात्र होइन — यो हाम्रो मायालु स्वर्गीय पितासँगको कुराकानी हो।

प्रार्थना भनेको परमेश्वरसँग कुरा गर्नु वा बात मार्नु र उहाँबाट सुन्नु हो। यो कुनै धार्मिक विधि वा कार्यक्रम हैन तर परमेश्वरसँगको जीवित सम्बन्ध हो।

तपाईं जहाँ भए पनि — नेपाल, भारत, मध्य पूर्व, वा घरबाट टाढा — तपाईं परिवारबाट टाढा हुनुहुन्छ होला, तर परमेश्वर तपाईंको नजिकै हुनुहुन्छ, तपाईंको हृदयबाटको प्रार्थना सुन्नका लागि पर्खिरहनुभएको छ।

६ कुनै कुरामा चिन्तित नहोओ, तर हरेक कुरामा प्रार्थना र निवेदनद्वारा धन्यवादसहित तिमीहरूका बिन्ती परमेश्वरमा जाहेर होऊन्,
७ र समझले नै भियाउन नसकिने परमेश्वरको शान्तिले तिमीहरूका हृदय र तिमीहरूका मनलाई येशूमा रक्षा गर्नेछ। फिलिप्पी ४:६–७

निरन्तर प्रार्थना गरिरहो। १ थिस्सलोनिकी ५:१७

प्रार्थनाले हाम्रो कमजोरीलाई परमेश्वरको शक्तिसँग, हाम्रो भ्रमलाई उहाँको बुद्धिसँग र हाम्रा आवश्यकताहरूलाई उहाँको प्रशस्ततासँग जोड्छ।

परमेश्वर तपाईंको शब्द भन्दा तपाईंको हृदयमा बढी चासो राख्नुहुन्छ।

निष्कपट हृदयले परमेश्वरकहाँ जानु पर्छ

प्रभावकारी प्रार्थना सही मनोवृत्ति (attitude)बाट सुरु हुन्छ, सिद्ध वा सुन्दर शब्दहरूबाट होइन।

• नम्रताका साथ आउनुहोस्, यो थाहा पाउँदै कि सबै कुरा परमेश्वरको नियन्त्रणमा छ।
• विश्वासका साथ आउनुहोस्, किनकि उहाँले सुन्नुहुन्छ र जवाफ दिनुहुन्छ।
• इमानदारीका साथ आउनुहोस् — आफ्ना वास्तविक भावनाहरू, भ्रम, डर, वा निराशा पनि उहाँलाई व्यक्त गर्नुहोस्।

जब तपाईं कमजोर हुनुहुन्छ — उहाँलाई भन्नुहोस्। जब तपाईं डराउनुहुन्छ — उहाँलाई भन्नुहोस्। जब तपाईं धन्यवादी हुनुहुन्छ — उहाँलाई भन्नुहोस्। परमेश्वरले नम्र हृदयको कुरा सुन्नुहुन्छ।

परमेश्वरले सुन्दर प्रार्थना भन्दा इमान्दार हृदयको कुरा बढी सुन्नुहुन्छ।

तोडिएको आत्मा नै परमेश्वरको निम्ति बलिदान हो। हे परमेश्वर, तोडिएको र पश्चात्तापी हृदयलाई तपाईं तिरस्कार गर्नुहुन्न। भजनसंग्रह ५१:१७

सुन्दर शब्द र प्रभावकारी भाषाले परमेश्वरलाई प्रभावित पार्ने प्रयास नगर्नुहोस्। केवल इमानदार हुनुहोस्।

परमेश्वरको वचनअनुसार प्रार्थना गर्नुहोस्

बाइबल प्रभावकारी प्रार्थनाको जग हो। जब हामी परमेश्वरका प्रतिज्ञाहरू अनुसार प्रार्थना गर्छौं, तब हामी उहाँको इच्छासँग हाम्रो इच्छालाई मिलाउँछौं वा एक गराउँछौं।

उदाहरणका लागि:

• जब तपाईं कमजोर महसुस गर्नुहुन्छ — यशैया ४०:३१लाई दाबी गरेर प्रार्थना गर्नुहोस्।
• जब तपाईं चिन्तित महसुस गर्नुहुन्छ — फिलिप्पी ४:६–७लाई दाबी गरेर प्रार्थना गर्नुहोस्।
• जब तपाईंलाई अगुवाई वा मार्गदर्शन चाहिएको छ — भजनसंग्रह ३२:८लाई दाबी गरेर प्रार्थना गर्नुहोस्।
• जब तपाईंलाई क्षमाको आवश्यकता हुन्छ — १ यूहन्ना १:९लाई दाबी गरेर प्रार्थना गर्नुहोस्।

वचनअनुसार प्रार्थना गर्नाले तपाईंको प्रार्थनालाई सत्यमा आधारित कुराकानीमा परिणत गर्छ।

येशूको नमुना पछ्याउनुहोस् (प्रभुको प्रार्थना)

येशूले हामीलाई एउटा नमुना दिनुभयो — मत्ती ६:९–१३।

• हे हाम्रा स्वर्गमा बस्नुहुने पिता — आराधना र सम्बन्धबाट सुरु गर्नुहोस्।
• तपाईंको नाम पवित्र गरियोस् — उहाँको पवित्रताको आदर गर्नुहोस्।
• तपाईंको राज्य आओस् — परमेश्वरको इच्छाका लागि प्रार्थना गर्नुहोस्।
• आज हामीलाई हाम्रो दैनिक रोटी दिनुहोस् — आफ्ना आवश्यकताहरू प्रस्तुत गर्नुहोस्।
• हाम्रा अपराधहरू क्षमा गर्नुहोस् — आफ्ना पापहरू स्वीकार गर्नुहोस् र क्षमा प्राप्त गर्नुहोस्।
• हामीलाई दुष्टबाट छुटाउनुहोस् — सुरक्षा र विजय खोज्नुहोस्।

हामीले यसलाई आफ्नो व्यक्तिगत प्रार्थनाको समयमा दैनिक प्रार्थनाको तरिकाको रूपमा प्रयोग गर्न सक्छौं।

शान्त रहन र सुन्न सिक्नुहोस्

प्रार्थना भनेको आफू बोल्नु मात्र होइन तर सुन्नु पनि हो। धेरै पटक, परमेश्वर बोल्नुहुन्छ:

• उहाँको वचनद्वारा
• पवित्र आत्माको शान्त आवाजद्वारा
• तपाईंको हृदयमा शान्ति वा असहजताद्वारा
• अन्य विश्वासीहरू, आत्मिक मानिसको सल्लाहद्वारा

परमेश्वरले तपाईंको आत्मामा उहाँको मार्गदर्शन तपाईंको कानमा कानेखुसी (whisper) फुसफुसाउन अनुमति दिनुभन्दा पहिले मौन रहनुहोस्।

शान्त होओ, र म परमेश्वर हुँ भनी जान। भजनसंग्रह ४६:१०

यदि तपाईं एक्लिएको, हराएको महसुस गर्नुहुन्छ भने, "बोल्न" बन्द गर्नुहोस्। उहाँको अगाडि चुपचाप बस्नुहोस् — उहाँले तपाईंलाई त्यहाँ भेट्नुहुनेछ।

पवित्र आत्मामा भएर प्रार्थना गर्नुहोस्

आत्माले भरिएका विश्वासीहरूका लागि, पवित्र आत्मामा प्रार्थना गर्नाले तपाईंको भित्री मानिसलाई बलियो बनाउँछ।

जब तपाईंलाई के प्रार्थना गर्ने थाहा छैन, पवित्र आत्मालाई मध्यस्थता गर्न दिनुहोस्।

त्यसै गरी पवित्र आत्माले पनि हाम्रो दुर्बलतामा सहायता गर्नुहुन्छ। कसरी प्रार्थना गर्नुपर्ने हो हामी जान्दैनौं, तर शब्दहरूमा व्यक्त गर्न नसकिने सुस्केरामा पवित्र आत्माले हाम्रा निम्ति मध्यस्थता गर्नुहुन्छ। रोमी ८:२६

दृढ र कृतज्ञ (धन्यवादी) रहनुहोस्

प्रभावकारी प्रार्थना एक पटकको गरिएको अनुरोध होइन तर यो निरन्तर उहाँमाथि गरिने भरोसा हो।

तिनीहरू सधैं प्रार्थना गरिरहून् र निराश नहोऊन्… लूका १८:१

सतर्क भएर धन्यवादसहित स्थिर भई प्रार्थनामा लागिरहो। कलस्सी ४:२

परमेश्वरले अब गर्नुहुने कार्यका लागि अग्रिम धन्यवाद दिनुहोस्। धन्यवादिताले विश्वासलाई पूर्ण गर्छ।

सँगसँगै वा एकसाथ प्रार्थना गर्नुहोस्

विश्वासीहरूको एकताको प्रार्थनामा शक्ति हुन्छ।

१९ फेरि म तिमीहरूलाई भन्दछु, पृथ्वीमा तिमीहरूमध्ये दुई जना कुनै कुरामा सहमत भई केही माग्यौ भने, त्यो स्वर्गका मेरा पिताद्वारा तिमीहरूका निम्ति हुनेछ,
२० किनकि जहाँ दुई कि तीन जना मेरो नाउँमा भेला हुन्छन्, त्यहाँ म तिनीहरूका माझमा हुनेछु। मत्ती १८:१९–२०

घरेलु संगति होस्, अनलाइन संगति होस्, सामूहिक प्रार्थना होस्, वा चर्चमा गरिएको प्रार्थना किन नहोस् — एकमन र एउटै चित्तको प्रार्थनाले समुदायलाई बलियो बनाउँछ र विश्वासीहरूमाझ जागृति ल्याउँछ।

प्रार्थनाका विषयहरू लेखेर राख्नुहोस्

तपाईंको प्रार्थना अनुरोधहरू र परमेश्वरका उत्तरहरू लेख्नुहोस्। समय बित्दै जाँदा, यो रेकर्डले तपाईंलाई उहाँको विश्वासयोग्यताको सम्झना गराउनेछ र अझ साहसपूर्वक प्रार्थना गर्न तपाईंको आत्मविश्वास बढाउनेछ।

परमेश्वरको सही समयमाथि भरोसा राख्नुहोस्

परमेश्वरले प्रार्थनाको जवाफ तीन तरिकाले दिनुहुन्छ: हुन्छ, हुँदैन, वा अलिक समय पर्खनुहोस्।

उहाँको "पर्खनुहोस्" चैं उहाँले हाम्रो प्रार्थना अस्वीकार गर्नुभएको हैन तर यो तयारी हो।

८ "किनकि मेरा विचारहरू तिमीहरूका विचार होइनन्, र तिमीहरूका चाल मेरा चाल होइनन्," परमप्रभु भन्नुहुन्छ।
९ जसरी आकाश पृथ्वीभन्दा अल्गो छ, त्यसरी नै मेरा चाल तिमीहरूका चालभन्दा र मेरा विचार तिमीहरूका विचारभन्दा अल्गा छन्। यशैया ५५:८–९

विश्वास भनेको परमेश्वरको हात नदेखे पनि उहाँको हृदयमा भरोसा गर्नु।

निरन्तर र कृतज्ञ रहनुहोस्

प्रार्थना एक पटकको गरिने घटना होइन। प्रार्थना गरिरहनु पर्छ, विश्वास गरिरहनु पर्छ।

तिनीहरू सधैं प्रार्थना गरिरहून् र निराश नहोऊन् भन्ने हेतुले उहाँले तिनीहरूलाई एउटा दृष्टान्त भन्नुभयो… लूका १८:१

र जवाफ आउनुभन्दा पहिले नै परमेश्वरलाई धन्यवाद दिन नबिर्सनुहोस्। कृतज्ञताले उहाँ पर्दा पछाडि काम गरिरहनुभएको छ भन्ने विश्वास देखाउँछ।